[Blueboard] FORUM SA PAGSASALIN

jsalazar at ateneo.edu jsalazar at ateneo.edu
Thu Nov 18 13:05:42 PHT 2004


FORUM SA PAGSASALIN
ISANG MAHALAGANG PAANYAYA

Malugod kayong inaanyayahan ng Samahan ng mga Tagasalin (SALIN), sa
pagtataguyod ng Kagawaran ng Filipino at ng Ateneo Institute of Literary
Arts and Practices (AILAP) ng Pamantasang Ateneo De Manila, sa gaganaping
"SALINAN 2: Isang Forum sa Pagsasalin ng Dula at Tekstong Pilosopiko" sa
ika-26 ng Nobyembre 2004, 1:00-4:00 ng hapon, sa Faculty Lounge, 3/F Dela
Costa Hall, Pamantasang Ateneo De Manila, Katipunan Rd. Loyola Heights,
Quezon City. Tampok na tagapagsalita sina Tomas Rosario, Jr., Ph.D., at
J. B. Capino, Ph.D. Ibabahagi ni Dr. Rosario, na tumanggap ng 2004
National Book Award for Book Translation mula sa Manila Critics Circle,
ang kaniyang karanasan at nilinang na proseso sa pagsasalin ng teksto ni
Santo Tomas de Aquino. Tatalakayin naman ni Dr. Capino ang mga pagtanaw
at pamamaraan niya sa pagsasalin sa Filipino ng mga klasikong dulang
pandaigdig.

Kasalukuyang pinamumunuan ni Dr. Aurora Batnag, isang pambansang
organisasyon ang SALIN na nagtataguyod ng propesyonalisasyon ng
pagsasaling-wika bilang akademiko at praktikal na  larang sa Filipinas.
Isa sa mga pangunahing proyekto nito para sa 2004-2005 ang SALINAN---
isang buwanang forum na inililibot sa mga pangunahing unibersidad o
sentro ng wika at kultura sa Kamaynilaan upang magsilbing tanghalan at
tagpuan ng mga nagkakaisa o nagkakasalungat na kaisipan hinggil sa
pagsasalin tungo sa pagbubukas ng marami pang pinto ng pagtuklas at
pag-unlad sa gawaing ito.

Matagumpay na naidaos ang "Salinan 1" sa Pamantasang De La Salle noong
ika-28 ng Oktubre 2004 sa pakikipagtulungan ng Departamento ng Filipino
ng nasabing institusyon. Naging tampok na tagapagsalita sina Dr. Allan B.
Borra at Dr. Janet Tauro-Batuigas. Paksang tinalakay ni Dr. Borra ang
computational linguistics at ang aplikasyon, pati na ang mga bentaha at
limitasyon nito, sa pagbuo ng machine translator. Sa kabilang dako,
kritisismo sa kasalukuyang praktis ng pagsasalin sa mass media, lalo na
sa mga telenobela, ang ibinigay ni Dr. Batuigas.

Ang Salinan 2 sa Ateneo ang unang pagtutulungan ng Samahan ng mga
Tagasalin at ng Kagawaran ng Filipino at Translation Desk ng Ateneo
Institute of Literary Arts and Practices ng Pamantasang Ateneo De Manila.
Bukas sa publiko ang aktibidad na ito. Para sa iba pang impormasyon,
maaaring makipag-alam kay G. Michael M. Coroza o Gng. Imelda Estrelles sa
telepono bilang 4266001 loc. 5320.




More information about the Blueboard mailing list